Bakıda 9 nəfəri gün vurub

18 İyun, 2019 13:35 | Sosial | Baxış sayı: 38
Günvurma
Günvurma

8 nəfər xəstəxanaya yerləşdirilib

İyunun 1-dən indiyədək günvurma diaqnozu ilə təcili tibbi yardıma 9 müraciət daxil olub.

İstiPress-in məlumatına görə, bu barədə Bakı Şəhər Təcili və Təxirəsalınmaz Tibbi Yardım Stansiyasının baş həkimi Rauf Nağıyev məlumat verib. Baş həkim bildirib ki, 1 nəfərə yerində yardım göstərilib, 8 nəfər isə xəstəxanaya yerləşdirilib, onlardan 2-si azyaşlıdır.

Günvurma zamanı başağrısı, ürəkbulanma baş verir. Nağıyev deyir ki, sonradan yaranan fəsadların qarşısını almaq üçün mütləq həkimə müraciət etmək lazımdır. Çünki başağrısı, halsızlıq, ətraf mühitə reaksiyanın zəifləməsi, ürəkbulanma ola və bu, son nəticədə ağır fəsadlarla nəticələnə bilər. Azyaşlılar, qocalar, xəstələr həssas qruplardır, onların vəziyyəti daha tez pisləşə bilər.

Günvurma zamanı zərərçəkəni kölgəyə aparmaq, soyuq su vermək, üzünü və sinəsini soyuq su ilə silmək, başına, boyunun yan tərəflərinə, qoltuqaltına (iri damarlar keçən yerlərə) buz və ya bu mümkün olmadıqda soyuq su ilə kompres qoymaq tövsiyə edilir. Bundan sonra mütləq həkimə müraciət etmək lazımdır.

Qeyd edək ki, isti havalarda saat 11.00-dan 17.00-dək açıq gün şüaları altına çıxmaq məsləhət görülmür. Açıq rəngli və təbii materialdan biçilmiş geyimlərdən istifadə edilməsi, çox su içilməsi, həmçinin aşağı kalorili, əsasən tərəvəzi bol olan yeməklərə üstünlük verilməsi tövsiyə olunur.