Azərbaycanda qızıl axtaranlar tarixi abidəni dağıdıb tökdülər

11 Noyabr, 2017 10:50 | Sosial | Baxış sayı: 418
Məhv edilən tarix
Məhv edilən tarix

12-17-ci əsrə aid ərazi darmadağın edilib

Azərbaycanda XII- XVII əsrə aid tarix dağıdılır. İstiPress-in Şimal bürosunun məlumatına görə, Xaçmazın Susayqışlaq kəndi ərazisində tarixi zona naməlum şəxslərin hücumuna məruz qalıb. Bu qədim tarixi ərazidə qədim qəbristanlıq, qədim qala, kurqan və yaşayış məskəni olduğu bildirilir. Bu barədə Susayqışlaq kənd sakini, Xudat texniki liseyinin tarix müəllimi Sərxan Qəribov məlumat verib.

Onun sözlərinə görə, təxminən 13-14 ildir ki, bu tarixi ərazidə naməlum adamlar qızıl axtarmaq adı ilə kor-təbii qazıntı aparır. "Axı bu qədim qəbirlərdə qızıl olması barədə şayiələr yayaıblar. Kimliyi bilinməyən şəxslər də tarixi məzarlığı son 14 ildə bərbad hala salıblar. Qədim insan sümükləri və saxsı əşyalar vaxtaşırı qazıldığından üzə çıxıb".

S. Qəribov bu ərazidə qədim qəbirlərin və tapılan əşyaların hər birinin ciddi araşdırma mövzusu olduğunu, burada 1382-ci ilə aid qadın qəbrinin mövcudluğunu da qeyd edib. Yerli tarix müəllimi bu meşəlik ərazidən tapılan saxsı əşyaların Qız qalası muzeyində olan məmulatlarla eyni olduğunu vurğulayıb.

Məsələ ilə bağlı şimal zonasında,xüsusən Quba məzarlığında xüsusi araşdırma və arxeoloji qazıntı aparmış Azərbaycan Milli EA-nın Arxeologiya və Etnorqafiya İnstitutunun aparıcı elmi işçisi Qəhrəman Ağayevlə əlaqə saxladıq. Həmin ərazinin naməlum şəxslər tərəfindən dəfinə axtaranlar tərəfindən qazılmasını tariximizə qarşı cinayət, hörmətsizlik və sui-qəsd adlandıran Q.Ağayev bu məsələnin ciddi araşdırmaya ehtiyacını olduğunu deyib.

"Dəfələrlə demişəm, yenə deyirəm hər hansı bir tapıntı, tarixi ərazi aşkar olunanda dərhal yerli icra hakimiyyəti məlumatlandırılmalı, öz növbəsində də icra qurumu Arxeologiya və Etnoqrafiya İnstitutuna rəsmi müraciət edərək burada qazıntı işləri aparmağa dəvət etməlidir.

Xaçmaz icra hakimiyyətinin instituta rəsmi müraciəti olarsa biz qısa vaxt ərzində Susayqışlaqda arxeoloji qazıntılara başlaya bilərik. Onsuzda bizdən əvvəl "qızıl axtaranlar" oranı qazıb dağıdıb. Biz barı gec də olsa bu zonanı tədqiq edib tariximizin qədimiliyi barədə mühüm faktlar əldə bilərik". 

Xaçmaz icra başçısının Susayqışlaq İnzibati Ərazi Dairəsi üzrə nümayəndəsi Mirzə Şahbazov isə meşəlik ərazidə yerləşən tarixi ərazidə heç bir qazıntı aparılmadığını bildirib. İcra başçısının birinci müavini Yetkin Mehmanov isə adıçəkilən ərazidə kimlərinsə qızıl axtarmağından xəbərsiz olduğunu, lakin tarixi ərazi ilə bağlı araşdırma aparılacağını dedi. Onun sözlərinə görə,araşdırmalar zamanı ərazinin qazıldığı təsdiqlənsə və zərurət yaransa, rayona arxeoloqlar rəsmi olaraq dəvət oluna bilər.