Bakıda şagirdi intihar edən məktəbin direktoru işdən kənarlaşdırılıb - RƏSMİ

08 Aprel, 2019 18:41 | Sosial | Baxış sayı: 169
Təhsil Nazirliyi
Təhsil Nazirliyi

Təhsil Nazirliyi açıqlama yaydı

162 nömrəli tam orta məktəbin direktoru Sevinc Abbasova işdən kənarlaşdırılıb. 

İstiPress-in məlumatına görə, bu barədə Təhsil Nazirliyindən bildirilib.

"Bakı şəhəri 162 nömrəli tam orta məktəbdə baş vermiş hadisə ilə bağlı açılmış cinayət işi üzrə istintaq və Bakı Şəhəri üzrə Təhsil İdarəsi tərəfindən aparılan xidməti araşdırma ilə əlaqədar yaranmış zərurəti nəzərə alaraq, hər iki istiqamət üzrə araşdırmanın tam obyektivliyini təmin etmək məqsədilə təhsil nazirinin 8 aprel 2019-cu il tarixli, K-388 saylı əmri ilə məktəbin direktoru Abbasova Sevinc Kamil qızı araşdırma müddətində işdən kənarlaşdırılıb. Məktəbin direktoru vəzifəsinin müvəqqəti icrası Bakı Şəhəri üzrə Təhsil İdarəsinin Ümumi təhsil sektorunun aparıcı məsləhətçisi İsgəndərov Əfqan Kərəm oğluna həvalə edilib", - məlumatda qeyd olunub.

Xatırladaq ki, Bakı Şəhər Prokurorluğu və Bakı Şəhəri üzrə Təhsil İdarəsinin məktəbdə baş vermiş hadisə ilə bağlı birgə yaydığı məlumatda qeyd olunduğu kimi, Bakı Şəhər Prokurorluğunda müvafiq istintaq tədbirləri həyata keçirilir. Aparılan istintaq tədbirləri nəticəsində hadisənin başvermə səbəbləri tam aydınlaşdırılacaq və bununla bağlı ictimaiyyətə əlavə məlumat veriləcək.