Azərbaycan XİN Ermənistanın Qarabağda hərbi təlimləri barədə

18 İyun, 2019 10:57 | Siyasət | Baxış sayı: 121
Azərbaycan XİN
Azərbaycan XİN

"Ermənistan rəhbərliyi öz hərəkətlərinin məntiqi izahını verə biləcəkmi?"

Azərbaycanın Xarici İşlər Nazirliyi (XİN) Ermənistan Müdafiə Nazirliyinin işğal altında olan Dağlıq Qarabağ regionunda 10 min hərbçinin iştirakı ilə təlimlər keçirdiklərinə dair bəyanatına münasibət bildirib.

İstiPress-in məlumatına görə, Nazirliyin Mətbuat xidməti idarəsinin rəisi Leyla Abdullayeva məsələ ilə bağlı açıqlamasında Ermənistan rəhbərliyinin məntiqini anlamaqda çətinlik çəkdiyini deyib:

"Ermənistanda müharibə tərəfdarlarının qələbə çaldığına inanmaq istəməzdim. Çünki bu dalana aparan bir yoldur. Xüsusilə də ATƏT-in Minsk Qrupunun həmsədrlərinin təklifi əsasında iki ölkənin xarici işlər nazirlərinin Vaşınqtonda keçiriləcək görüşü ərəfəsində Ermənistan tərəfinin bu addımları anlaşılmazdır.

Həqiqətən, Ermənistan rəhbərliyinin məntiqini anlamaq çətindir. Bir tərəfdən Müdafiə naziri Azərbaycanın işğal olunmuş Dağlıq Qarabağ ərazisində 10.000 hərbi qulluqçunun iştirakı ilə hərbi təlimlərin keçiriləyini bəyan edir. Digər tərəfdən isə bu ölkənin xarici işlər naziri Vaşınqtona münaqişənin sülh yolu ilə həlli üzrə danışıqlar aparmağa hazırlaşır. Belə olan halda Ermənistan rəhbərliyi öz hərəkətlərinin məntiqi izahını verə biləcəkmi? İstər-istəməz Rusiya, ABŞ və Fransadan olan həmsədrlərə, bundan sonra nə? - sualı ilə müraciət etməli oluruq".