Baş redaktor məhkəmədə ifadə verib

11 Yanvar, 2019 18:35 | Siyasət | Baxış sayı: 62
Anar Məmmədov məhkəmədə
Anar Məmmədov məhkəmədə

Anar Məmmədov ona qarşı irəli sürülmüş ittihamları absurd sayıb, qəbul etmədiyini söyləyib

Bakı Ağır Cinayətlər Məhkəməsində "Criminalaz.com" saytının baş redaktoru Anar Məmmədov barəsində qaldırılmış cinayət işi üzrə ifadə verib. 

İstiPress-in məlumatına görə, A.Məmmədov elan olunmuş ittiham üzrə  özünü təqsirli bilmədiyini söyləyib. O, sərbəst ifadəsində ona qarşı irəli sürülmüş ittihamları absurd sayıb, qəbul etmədiyini söyləyib.

Qeyd edib ki, saytda yazdığı yazılar sırf jurnalistika peşəsinə uyğun olub: "Yazılardan birini "Turan" İnformasiya Agentliyindən istinadla vermişəm. Digərini isə politoloq Ərəstun Oruclunun Gəncə hadisələri ilə bağlı yazdığı bloquna istinadən vermişəm. Bu yazılara istinad etdiyim üçün heç bir məsuliyyət daşımıram. Gəncənin sabiq icra başçısı Elmar Vəliyevlə heç bir ədavətim, ümumiyyətlə, münasibətim belə olmayıb".

Daha sonra həyat yoldaşı Gülnar Məmmədova şahid qismində məhkəməyə dəvət edilib. O, ailə üzvlərindən olduğunu deyərək ifadə verməkdən imtina edib.

Məhkəmənin baxış iclası yanvarın 18-nə təyin olunub.

Qeyd edək ki, A.Məmmədov Cinayət Məcəlləsinin 281.2-ci (dövlət əleyhinə yönələn açıq çağırışlar), 309.2-ci (vəzifə səlahiyyətlərini aşma) və 313-cü (vəzifə saxtakarlığı) maddələri ilə ittiham olunur.