Ermənilərin hücumuna iki gün qalıb

10 Yanvar, 2019 18:06 | Siyasət | Baxış sayı: 1129
Rusiyanın 102-ci hərbi bazasının hərbçiləri təlim zamanı
Rusiyanın 102-ci hərbi bazasının hərbçiləri təlim zamanı

Siyasi güclər yürüşə Paşinyanın rəhbərlik etməsini tələb edirlər

Ermənilərin Gümrü 102-ci Rusiya hərbi bazasına qarşı etiraz  yürüşü təyin etdiyi 12 yanvar tarixinə az qalıb.

İstiPress-in məlumatına görə, əksər erməni siyasətçiləri bu yürüşə Ermənistan Avropa Partiyasının rəhbəri, kinorejissor Tiqran Xzmalyanın deyil, baş nazir Nikol Paşiyanın rəhbərlik  etməsini tələb edirlər. Bu yürüşün məqsədini izah edən Tiqran Xzmalyan bildirib ki, Ermənistanı müstəqil ölkə saymaq olmaz – sərhədləri Rusiya ordusu qoruyur, iqtisadiyyat da Rusiyaya məxsusdur.

Bu məsələyə “ArmenianReport” portalında məqalə həsr etmiş erməni şərhçi Hraçya Qalustyan bildirib ki, bu fikir ölkənin bütün siyasi gücləri üçün əsas devizə çevrilməlidir: “Çox yaxşı olardı ki, gələcək etirazın başında yalnız Tiqran Xzmalyan deyil, Nikol Paşinyan da getsin. Çünki bütün Ermənistanın ümidi indi yalnız onadır”.

Gümrüdə 102-ci Rusiya hərbi bazası
Gümrüdə 102-ci Rusiya hərbi bazası

Erməni şərhçi Naira Ayrumyan isə “Lragir”də Paşinyanın Rusiya qarşısında qorxaqlıq nümayiş etdirməsini tənqid edir. O, Rusiya XİN sözçüsü Mariya Zaxarovanın Ermənistanı natamam dövlət adlandırmasını da yada salır və Ermənistan hakimiyyətini buna cavab verməyə çağırır.

Ayrumyanın fikrincə, artıq Paşiyanın Rusiyanı öz adı ilə çağırmasının vaxtı çatıb və susmaq əbəsdir: “Ermənistanın yeni hökuməti tərəfindən siyasi qiymətləndirmənin olmaması yalnız bu siyasətdə Rusiyaya yardım edir”,- deyə Naira Ayrumyan bildirib.

Təbii ki, gec-tez bu təzyiqlər özünü göstərəcək və Paşinyan açıq şəkildə Rusiyaya qarşı çıxmalı olacaq. Bunu narıncı inqilabın təcrübəsi də göstərir - Serj Sarkisyan ölkəsini Avrasiya İttifaqına daxil etdikdən sonra Qərb fondları Ermənistanda Rusiya əleyhinə böyük fəaliyyətə başladılar – 2 minə yaxın jurnalist və ekspert, QHT təmsilçisi Qərbdən mütəmadi maliyyə vəsaitləri ayırmağa başladılar və bir ilin ərzində Ermənistanda Rusiya əleyhdarlarının payı 10 faizdən 40 faizə qədər qalxdı.

Serj Sarkisyan tərəfdarları onda bunun qorxulu olmadığını iddia etsələr də, nəticə göz qabağındadır – Rusiyanın adamları Ermənistanda hakimiyyəti  itirdilər. İndi həmin dalğa ikinci təkanla davam edir, elə həmin ekspertlər, siyasilər və KİV təmsilçiləri Paşinyandan ölkəni müstəqilləşdirməyi və rus qoşununu çıxarmağı, Qərbə istiqamət götürməyi tələb edirlər. Yəni bu da gec-tez özünü göstərəcək və Paşinyan Rusiyaya qarşı açıq mətnlə çıxış edəcək.

Bu məsələni Rusiya tərəfi də anlayır. Məsələn, Rusiyanın "Kommersant" qəzeti bu günlərdə dərc etdirdiyi bir məqalədə Paşinyanı “əlverişsiz tərəfdaş” adlandırıb. Burada həm Paşinyanın Rusiyanın adamı olan keçmiş prezident Robert Koçaryana, həm də rus NATO-su KTMT-nin keçmiş baş katibi Yuri Xaçaturova qarşı düşmən münasibəti özünü göstərir. Məqalə müəllifi Rusiyanı Paşiyanı daha ciddi düşmən addımlarına hazır olmağa çağırır.

Ermənistanda 102-ci Rusiya bazasının təsir dairəsi
Ermənistanda 102-ci Rusiya bazasının təsir dairəsi

Göründüyü kimi, yaxın aylarda Ermənistan – Rusiya münasibətlərində ciddi gərginlik yaşana bilər. Təbii ki, indi Qərbdə Paşiynanın “demokratiya mələyi” kimi bir imici var və bəzi qərb KİV-ləri Ermənistanı ilin ölkəsi adlandırıblar və Azərbaycan bütün bu nüansları nəzərə almaqla yanaşı, bu prosesdən maksimum yararlanmalıdır. Çünki sirr deyil ki, Ermənistan Azərbaycan torpaqlarını məhz Rusiyanın dəstəyi ilə işğal altında saxlayır. Ermənistanın bu dəstəyi tezliklə itirməsinə maksimum çalışmaq lazımdır.