Azərbaycanlı müğənniyə efir qadağası qoyuldu - biabırçılığa görə

08 Aprel, 2019 12:24 | Mədəniyyət | Baxış sayı: 394
Rüfət Axundov
Rüfət Axundov

Əxlaqa zidd ifadələr işlədildiyi üçün iki nəfər işdən çıxarılıb

Space TV-nin canlı efirində “Hər səhər” proqramında mahnı oxuyarkən qeyri-etik və əxlaqa zidd ifadələr işlədildiyi üçün iki nəfər işdən çıxarılıb. Bu barədə jurnalistlərə Milli Televiziya və Radio Şurasının (MTRŞ) Aparat rəhbəri Asəf Hacıyev məlumat verib. O bildirib ki, onlardan biri verilişin aparıcısı Anar Vaqifoğlu, digəri isə verilişin səs rejissorudur.

Aparat rəhbəri müğənni Rüfət Axundova efir qadağası tətbiq edilməsi ilə bağlı yayılan məlumatı da təsdiqləyib.

O bildirib ki, milli televiziyalara bu gün şifahi xəbərdarlıq göndəriləcək: “Qanunla yazılı xəbərdarlıq etmək mümkün olmadığı üçün MTRŞ şifahi xəbərdarlıq göndərmək qərarına gəlib. Bu gün ərzində televiziya rəhbərlərinə xəbərdarlıq göndəriləcək. Bundan sonra xəbərdarlığa əməl edilib-edilməməsi artıq yayımçıların öz məsuliyyətindən asılıdır”. A.Hacıyev əlavə edib ki, bu qadağa radiolara da aid edilməlidir.

MTRŞ rəsmisi daha bir məsələyə aydınlıq gətirib. O, həmin qalmaqalda müğənni Rəşad İlyasovun da adının hallanmasının yanlış olduğunu qeyd edib. "Biz müəyyən etdik ki, Rəşadlıq bir şey yoxdur. O, mahnını ifa etməyib. Ona görə də qadağa təkcə Rüfət Axundova şamil edilib".

Xatırladaq ki, Space TV-nin “Hər səhər” verilişində müğənni Rüfət Axundov mahnı oxuyarkən efirə ədəbsiz söz və ifadələr gedib. Buna görə Milli Televiziya və Radio Şurası televiziyanı səkkiz min manat cərimələyib.