Ermənistandan köç sürətlənib

11 Noyabr, 2019 14:23 | İqtisadiyyat | Baxış sayı: 112

İşsizlər daha yaxşı bir həyat axtarışı üçün ölkəni tərk edirlər

Ermənistanda aparılan hesablamalara görə, ölkədən miqrasiya edənlərin sayının artdığı məlum olub.

İstiPress "Vestikavkaza.ru"ya istinadən bildirir ki, bu barədə erməni iqtisadçı Tadevos Avetisyan bildirib. 

Onun sözlərinə görə, təkcə son üç ay ərzində əmək bazarını 51 500 nəfər tərk edib: "Bunun 46 min 400-ü işsizlərdir. Bu meyl, əsasən, mühacirətin nəticəsidir".

Yalnız son bir neçə ay ərzində rəsmi qeydiyyata alınmış işsizlərin 20 faizi başqa ölkələrdə iş taparaq Ermənistanı tərk edib. İşsizlər daha yaxşı bir həyat axtarışı üçün ölkəni tərk edirlər.

Ermənistan hökumətinin rəsmi “Facebook” səhifəsində də ölkənin Miqrasiya Xidmətinə istinadən bu barədə statistik məlumatlar paylaşılıb. Statistikaya görə, ölkədən əhalinin köçü davam edir, lakin bu il azalma müşahidə olunub. Yəni 2018-ci ildə sentyabr ayına kimi ölkəni 15 695 nədər tərk etmişdisə, bu ilin ilk 10 ayı ərzində bu rəqəm 9857 nəfər olub.

Ermənistanın baş naziri Nikol Paşinyan 2050-ci ilə qədər ölkə əhalisinin sayının beş milyon nəfər olmasını strateji planı kimi açıqlayıb. Hazırda ölkə əhalisi 2,9 milyondur. İqtisadçılar isə hökumətin və Paşinyanın dediklərinə şübhəli yanaşırlar. Onlar bildiriblər ki, Ermənistandan işçi axını azalmır, əksinə dayanmadan artır.

Milli Statistika Xidmətinin məlumatına görə, Ermənistan əhalisi azalmaqda davam edir: əhalinin sayı cari ilin oktyabr ayının 1-i ötən ilin doqquz ayı ilə müqayisədə 11,700 nəfər azalaraq 2.957.500 nəfər olub, 2017-ci ilin eyni dövrü ilə müqayisədə isə ölkə əhalisi 22,1 min nəfər azalıb.