Nazirlik pensiya yaşını artırmamağı məqbul saydı

10 Yanvar, 2019 15:16 | İqtisadiyyat | Baxış sayı: 421
Yardım
Yardım

Qurumun yaxın zamanlarda yeni qanunvericilik təklifi ilə çıxış edəcəyi istisna edilmir

Azərbaycanda gözlənilən pensiya ödənişi müddəti dünya ölkələri arasında yüksək göstəricilər sırasındadır. Əmək və Əhalinin Müdafiəsi Nazirliyindən İstiPress-ə verilən məlumata görə, Azərbaycanda gözlənilən orta ömür uzunluğu kişilər üçün 73,1 yaş, qadınlar üçün 77,8 yaş təşkil edir. Pensiya ödənişi müddəti də məhz bu göstəricilərə və mövcud pensiya yaşına əsaslanmaqla müəyyən olunur.

"Bu baxımdan həmin göstəriciləri və ölkəmizdə  pensiya qanunvericiliyinə əsasən, hazırda pensiya hüququ qazanmaq üçün yaş həddinin kişilər üçün 64, qadınlar üçün 61 yaş olduğunu nəzərə aldıqda, gözlənilən pensiya ödənişinin orta müddəti kişilər üçün 9,1 il, qadınlar üçün isə 16,8 il olmaqla, ümumilikdə orta hesabla 13 il təşkil edir. Bu göstərici (13 il) isə dünya ölkələri arasında yüksək göstəricilər sırasındadır.

Digər tərəfdən, pensiya qanunvericiliyində pensiya yaşına çatmamış dünyasını dəyişən şəxslərlə bağlı da ədalətli, obyektiv yanaşmalar əksini tapır. Belə ki, əmək pensiyasının hazırda üç növü vardır ki, onlardan biri də ailə başçısını itirməyə görə pensiya növüdür. Pensiya yaşına çatmamış dünyasını dəyişən şəxslərin sığorta stajı, ödəmiş olduqları sığorta vəsaitləri hesabına fərdi hesablarında toplanan pensiya kapitalı əsasında qanunvericilikdə nəzərdə tutulan qaydada ailələrinə pensiya təyinatı həyata keçirilir.

Hazırda əmək pensiyaçılarının 150,6 mini və ya 11,6 faizi ailə başçısını itirməyə görə pensiya alanlardır".

Qeyd edək ki, “Əmək pensiyaları haqqında” Azərbaycan Respublikasının Qanununa edilmiş dəyişikliyə əsasən kişilər və qadınlar üçün pensiya yaşı 65-ə qaldırılıb. Beləliklə, Əmək və Əhalinin Müdafiəsi Nazirliyi bu araşdırması ilə əslində qadın və kişilər üçün pensiya yaşının aşağı olmasını vacib sayıb. Bu baxımdan, nazirliyin yaxın zamanlarda yeni qanunvericilik təklifi ilə çıxış edəcəyi istisna edilmir.