Bakıda qızıl yumurtalayan qaz

06 Yanvar, 2018 19:05 | İqtisadiyyat | Baxış sayı: 1358
Qızıl yumurta - KOLLAL
Qızıl yumurta - KOLLAL

Azərbaycanda güman edilən 24 milyon manatlıq qaz oğurluğu

Yanvarın 10-a qədər olan qaz sərfini dekabrın adına yazan “Azəriqaz”  abunəçilərdən aldığı artıq pulla ifrat şəkildə yol verdiyi qaz itkisini ört-basdır etməyə çalışır.

İstiPress-ə bu barədə  Neftçilərin Hüquqlarının Müdafiə Təşkilatının sədri Mirvari Qəhrəmanlı bildirib.  Onun sözlərinə görə, bu barədə ona “Azəriqaz” da işləyən mənbə bildirib.

Mirvari Qəhrəmanlı - Neftçilərin Hüquqlarının Müdafiə Təşkilatının sədri
Mirvari Qəhrəmanlı - Neftçilərin Hüquqlarının Müdafiə Təşkilatının sədri

"Mənim əldə etdiyim məlumata görə, 2016-cı ildə “Azəriqaz” da 1 milyard kubmetrə qədər itki olub.  Həmin qazı yerlərdə nəzarətçilər qeyri-rəsmi şəkildə istixanalara verirlər. Şirkət isə bunun səviyyəsini bir qədər azaltmaq üçün abunəçiləri soymağa başlayır", - deyə Mirvari Qəhrəmanlı vurğulayıb.

Mənbənin Mirvari Qəhrəmanlıya dediyinə görə, bunun üçün sayğaclardan göstəriciləri distansion üsulla götürən terminalların proqramına müdaxilə olunub: "Yəni terminal yanvarın 8-10-da götürdüyü göstəricini dekabrın 29-u kimi qeydə alır. Nəticədə abunəçi yanvarın əvvəlində qazın kubmetri üçün 10 qəpik ödəməli olduğu halda, 20 qəpikdən ödəməli olur. Bu, az pul deyil. Ölkədə 2 milyon qaz abunəçisi var, bunun 60 faizi limiti keçmişlərdir. Bir limiti kesmiş ailə ay ərzində qaza ən azı 60 manat xərcləyir, yəni 10 gün ərzində “Azəriqaz”  bir müştəridən ən azı 20 manat artıq pul alır. 1,2 milyon abunəçi üzrə bu, 24 milyon manat edər. Yəni bu əməliyyat nəticəsində 24 milyon manatlıq korrupsiya faktı ört-basdır edilir",- deyə Mirvari Qəhrəmanlı vurğulayır.

Qeyd edək ki, bu barədə qaz abunəçiəri də müxtəlif KİV-lərə müraciət ediblər. Məsələn, "baku.ws"ə Şəki rayonu Orta Zəyzid kənd sakini Sakit Bəkirova şiakayət edib. Onun sözlərinə görə, ötən gün “Azəriqaz”ın əməkdaşı Gülüstan Bayramov abonentin evinə gələrək sayğacı sıfırlayıb və yekun borc 38.70 AZN müəyyən edib. Abonent Sakit Bəkirovaya təqdim olunan qəbzdə isə son göstəricinin tarixi bir həftə əvvəli, yəni dekabrın 29-u qeyd olunub.

Şikayətçi qaz abunəçisi deyir ki, sayğaca dekabrın 27-də 50 manat məbləğində qaz yükləmişdi. Bu qəbzdə də qeyd olunub. Bir həftə ərzində, dekabrın 29-dan yanvarın 5-dək isə abonentin qaz pulu 20 qəpikdən hesablanıb. Şikayətçinin sözlərinə görə, Orta Zəyzid kəndində əksər abonentlərə anoloji hadisə ilə qarşılaşıblar.

İbrahim Kəlbəliyev - “Azəriqaz” İstehsalat Birliyinin mətbuat xidmətinin əməkdaşı
İbrahim Kəlbəliyev - “Azəriqaz” İstehsalat Birliyinin mətbuat xidmətinin əməkdaşı

“Azəriqaz” İstehsalat Birliyinin mətbuat xidmətinin əməkdaşı İbrahim Kəlbəliyev isə İstiPress-ə müsahibəsində bütün bu ittihamları təkzib edib: "Keçən il də sayğaclar yanvarın 10-na kimi oxunub. Ona görə burda problem yoxdur, hesab illik gedir. Yəni hər bir abunəçinin sıfırlanması 1 ildən sonra baş verir".