"Neftçi"nin yeni baş məşqçisinin adı bəlli oldu

11 Sentyabr, 2017 17:40 | İdman | Baxış sayı: 102
"Neftçi" FK loqo
"Neftçi" FK loqo

45 yaşlı mütəxəssislə mövsümün sonunadək müqavilə bağlanıb.

"Neftçi”nin əsas komandasına yeni baş məşqçi təyin olunub. İstiPress klubun rəsmi saytına istinadən xəbər verir ki, “ağ-qaralar”a Tərlan Əhmədov rəhbərlik edəcək. 

45 yaşlı mütəxəssislə mövsümün sonunadək müqavilə bağlanıb. T.Əhmədov bu gün saat 17:00-da komandanı məşqə çıxaracaq. 

Azərbaycan Premyer Liqasının V turu çərçivəsində sentyabrın 16-da baş tutacaq "Neftçi” – "Zirə” oyunundan bir gün əvvəl yeni baş məşqçinin rəsmi təqdimatı ilə bağlı mətbuat konfransı keçiriləcək. 

Qeyd edək ki, T.Əhmədov 1989-1991, 1998-2002-ci illər ərzində "Neftçi”də çıxış edib, 117 oyunda 6 qol vurub. 1999-cu ildə ölkə kubokunun qalibi olub və Azərbaycanın ən yaxşı futbolçusu seçilib. 1992-2005-ci illər ərzində milli komandada 75 oyun keçirib. 45 yaşlı mütəxəssis 2011-2013-cü illərdə "Neftçi”də məşqçi vəzifəsində çalışıb. Həmin müddətdə komanda Azərbaycan çempionatının (2012, 2013) və kubokunun (2013) qalibi olub, futbol tariximizdə ilk dəfə UEFA Avropa Liqasının qrup mərhələsinə vəsiqə qazanıb (2012).

Tərlan Əhmədov
Tərlan Əhmədov