Turisti vurub qaçan sürücü iki ay sonra tutuldu

25 May, 2018 16:05 | Hadisə | Baxış sayı: 61
Cinayətkarın həbsi - ARXİV
Cinayətkarın həbsi - ARXİV

Kürdəmir rayonunda piyadanı vurub hadisə yerindən qaçmaqda şübhəli bilinən sürücü saxlanılıb.

İstiPress-ə DİN-ə istinadən verdiyi xəbərə görə, bu il martın 25-də saat 21 radələrində Baş Dövlət Yol Polisi İdarəsinin Kürdəmir rayonu ərazisindəki stasionar postundan Rayon Polis Şöbəsinə Stansiya Karrar kəndi ərazisində bir nəfərin avtomobillə vurulması barədə məlumat daxil olub.

Yol polisi əməkdaşları dərhal yaralını xəstəxanaya çatdırıblar. Polis əməkdaşları tərəfindən aparılan araşdırmalarla həmin şəxsin əcnəbi vətəndaş İnayatxon Nauruzova olduğu və yolu keçərkən avtomobillə vurulduğu müəyyən edilib.

Faktla bağlı cinayət işi başlanılıb.

Həkimlərin səyinə baxmayaraq ağır bədən xəsarətləri almış qadının həyatını xilas etmək mümkün olmayıb və o, martın 30-da xəstəxanada vəfat edib.

İstintaq və əməliyyat-axtarış tədbirləri ilə yol nəqliyyat hadisəsinin “Mercedes” markalı avtomobillə törədildiyi müəyyən edilib. Yol qəzasını törədərək hadisə yerindən yayınmaqda şübhəli bilinən həmin avtomobili idarə edən Qazax rayon sakini Rauf Musayev saxlanılaraq istintaqa təhvil verilib.