Bakıda həkim əməliyyat etdiyi xəstəni döyüb? RƏSMİ

18 Yanvar, 2020 12:06 | Hadisə | Baxış sayı: 209
Əməliyyat edilən qadın
Əməliyyat edilən qadın

Milli Oftalmologiya Mərkəzi insult keçirən xəstənin qızının ittihamlarına cavab verdi

Zərifə Əliyeva adına Milli Oftalmologiya Mərkəzində həkimin pasiyenti döyərək təhqir etməsi ilə bağlı sosial şəbəkələrdə yayılan məlumatlarlara rəsmi münasibət bildirilib.

Mərkəzdən verilən məlumata görə,  həmin xəstə üç dəfə insult keçirib. Bu səbəbdən ona narkoz verilməyib və lokal keyitmə ilə əməliyyat aparılıb:

"Əməliyyatı həyata keçirən həkim Emil Hüseynov deyir ki, əməliyyat zamanı xəstə başını sabit saxlamayıb. O da məcbur olub xəstənin çənəsindən tutub ki, prosesin gedişatı pozulmasın. Linza qoyan zaman xəstə başını tərpədəndə düz yerinə oturmur və bu, fəsadlar yarada bilər. Xəstə əməliyyatdan çıxanda hər kəsdən razılıq edərək gedib. Görünür, sonradan xəstəni kimsə öyrədib. Həkim necə xəstəni vura bilər? Hələ söyüş söymək, ümumiyyətlə, inandırıcı deyil.

Qeyd edək ki, bu həkim 2005-ci ildən bu günə qədər üç min pulsuz əməliyyat keçirib. Mərkəzin ən yaxşı həkimlərindən biridir”.

Xatırladaq ki, yaşlı qadının zorakılığa məruz qalması barədə məlumatı onun qızı vermişdi. Qızının sözlərinə görə, gözündə katarakta əməliyyatına girən qadın  əməliyyatxanadan ağlaya –ağlaya, üzündə göyərmə və hematoma ilə çıxıb.

“Anam 2 dəfə insult keçirib, nitqində bir az qüsur var. Gözündə katarakta əməliyyatı ilə bağlı xəstəxanada Emil Hüseynov adlı həkimlə danışmışdıq. İlk söhbətdə həkim yaxşı təəssürat bağışladı. Həkim xəstənin də insultdan sonra bir qədər narahat olduğunu bilirdi.
Əməliyyat günü bizə səhər 8-də gəlin dedilər, anamı içəri aldılar, amma xəstə yaxınlarını buraxmadılar. Biz, digər xəstə yaxınları da 1 saat soyuq, yağışlı havada küçədə dayanmalı olduq.

Anam əməliyyatdan çıxanda şoka düşdük. O, göz yaşları içində, üzü göyərmiş, şişmiş halda idi. Elə bildik əməliyyatda belə olur. Bir anlıq duruxduq. Amma sonra düşündük ki, gözdə zərgər dəqiqliyi ilə aparılan əməliyyatda anamın üzü niyə göyərsin?

Anam ağlamaqdan boğula –boğula anlatdı ki, onu həkim Emil Hüseynov içəridə söyüşlə təhqir edərək, yanağından vurub. Baş həkimin qəbuluna gedib, məsələni danışdıqda, “belə şey ola bilməz deyib”, heç həkimi çağırmadılar”.

Elə xəstəxanadaca 102 xidmətinə şikayət edib, məsələni rəsmiləşdirən xanıma bir neçə dəqiqə sonra Emil Hüseynov özü zəng edərək, şikayəti geri götürmək üçün xahiş etməyə başlayıb:

“Həkim dedi ki, bəzi səbəblərdən əsəblərini cilovlaya bilməyib və xəstəni yüngülcə vurub: “Hər kəsdə belə hal ola bilər. Pulunuzu qaytarıb, üzr istəyə bilərəm”.

Mənsə bu təklifdən imtina edib, şikayətimdə qaldım. İndi hüquq-mühafizə orqanlarından müdaxilə gözləyirəm, anamı ekspertdən də keçirəcəm".