Narkotik satıcısı tutuldu: oğurlanmış qızıllar tapıldı

11 Dekabr, 2017 18:53 | Hadisə | Baxış sayı: 88
Qızıl zinət əşyaları
Qızıl zinət əşyaları

Şirvan Şəhər Polis Şöbəsinin (ŞPŞ) əməkdaşları tərəfindən narkotiklərin qanunsuz dövriyyəsinin qarşısının alınması istiqamətində ötən gün əməliyyat tədbiri keçirilib.

İstiPress-ə DİN Mətbuat Xidmətinin Şirvan regional qrupundan məlumata görə, ŞPŞ-nin uğurlu əməliyyat-axtarış tədbirləri nəticəsində narkotik vasitələrin qanunsuz dövriyyəsi ilə məşğul olmaqda şübhəli bilinən şəhər sakini Eldost Mikayılov saxlanılıb. Onun üzərinə baxış zamanı 0,936 qram narkotik vasitə olan tiryək aşkar olunaraq götürülüb.

Ətrafında aparılan tədbirlərlə E.Mikayılovun başqa bir cinayət törətdiyi də məlum olub. Belə ki, həmin şəxs cari il dekabrın 9-da şəhər ərazisindəki qızıl əşyalarının alışı və satışı mağazasına gələrək bir ədəd 600 manat dəyərində qızıl boyunbağını və 150 manat dəyərində qızıl üzüyü baxmaq adı ilə götürərək qaçıb.

Oğurladığı qızılları Bakı şəhərində qızıl mağazalarının birinə qiymətindən ucuz satıb. Araşdırmalarla həmin qızılların müəyyən qismi maddi sübut kimi götürülüb.

Şirvan ŞPŞ-nin İstintaq bölməsində araşdırma aparılır.